ՍՏԵՓԱՆԱԿԵՐՏ, <<Ապառաժ>> - Յունիս 27ին կայացած Արցախի Հանրապետութեան Ազգային ժողովի հերթական լիագումար նիստին, ՀՅԴ Արցախի Կեդրոնական կոմիտէի  ներկայացուցիչ եւ խորհրդարանի անդամ Դաւիթ Իշխանեան ներկայացուց ՀՅԴ Արցախի Կեդրոնական կոմիտէին հետեւեալ յայտարարութիւնը.

<<Անցած մէկ ամսուայ ընթացքում ՀՅԴ Արցախի կառոյցը, օգտագործելով տարբեր ձեւաչափեր ու հարթակներ՝ իր մտահոգութիւններն ու տեսակէտներն է հնչեցրել Արցախում ստեղծուած ներքաղաքական իրավիճակի ու անելիքների մասին: Այդ ամէնը մամուլով եւ ուղղակի հանդիպումներով փոխանցուել է թէ՛ հանրութեանը, թէ՛ իշխանութիւններին եւ թէ՛ քաղաքական ուժերին:

Սկսուած ներքաղաքական գործընթացը Արցախում անցնելու է մի քանի հանգրուանով: Մենք դեռեւս յաղթահարում ենք այս զարգացող գործընթացների նախ-նական փուլը:

Վերլուծելով դէպքերի զարգացումներն ու իրադարձութիւնները, գնահատելով հնչեցուած քաղաքական պահանջներն ու քայլերը, ծանօթ լինելով հանրութեան տարբեր շերտերի մօտ առկայ դժգոհութիւններին ու ակնկալիքներին՝ կարելի է կատարել որոշակի ամփոփումներ եւ եզրակացութիւններ.

– Երկրում ընթացող բարեփոխումները պէտք է ունենան համակարգային բնոյթ: Ողջունելի է ԱՀ նախագահի կողմից յայտարարուած բարեփոխումների իրականացման մեկնարկը. այն պէտք է ունենայ հարկ եղած թափն ու վճռական ընթացքը եւ արտացոլի հասարակութեան լայն շերտերի ցանկութիւնը ու յուսադրող մթնոլորտ ապահովի երկրի բնականոն զարգացման համար.

– Անհրաժեշտ է առաւել թափանցիկ դառնայ պետական մարմինների գործունէութիւնն ու իշխանութեան կատարած աշխատանքների ծանուցումը հասարակութեանը՝ ապահովելով լրատուական դաշտի ազատ եւ թափանցիկ գործունէութիւն.

– Բարեփոխումները չպէտք է առիթ դառնան մինչ այս պետական պատասխանատու պաշտօններ ստանձնած անձանց թերացումների եւ բացթողումների անտեսմանը եւ ըստ այդմ՝ պատասխանատուութիւնից խուսափմանը.

– Բարեփոխումները չպէտք է սահմանափակուեն միայն կադրային նշանակումներով եւ տեղաշարժերով, որոնք չեն կարող ամբողջականացնել հանրութեան սպասելիքները:

Քաղաքական անցնցում զարգացումները երաշխիք են անվտանգութեան ապահովման ու պահպանման համար: Ստեղծուած իրավիճակում, Հայ Յեղափոխական Դաշնակցութիւնը, որպէս խորհրդարանական ուժ՝ իր պար-տականութիւնն է համարում ներ-կայացնել համապատասխան տեսակէտներ ու առաջարկներ եւ գործնական հողի վրայ դնելով բարեփոխումների ընթացքը՝ կրել քաղաքական պատասխանատուութիւն: Անշուշտ, քաղաքական պատասխանատուութեան չափը կախուած կը լինի բարեփոխումների ընթացքում մեր մասնակցութեան եւ դերակատարութեան աստիճանից:

Համոզուած ենք, որ Հայ Յեղափոխական Դաշնակցութիւնը, որպէս համահայկական կառոյց, ունի այն ներուժն ու ունակութիւնը, որ երկրի կառավարման համակարգում կրի պատասխանատուութիւն, որն անկասկած կը նպաստի Արցախի պետականութեան ամրապնդմանն ու միջազգային հեղինակութեան բարձրացմանը>>: