ԵՐԵՒԱՆ.- Վարչապետ Նիկոլ Փաշինեան Երեւանի Ալեքսանդր Սպենդիարեանի անուան օփերայի եւ պալէի ազգային ակադեմական թատրոնին մէջ, Երեքշաբթի, 24 Յուլիսին ներկայ գտնուեցաւ ՀՄԸՄի հիմնադրման 100ամեակին նուիրուած ձեռնարկին:

Վարչապետը ՀՄԸՄի բոլոր անդամները ջերմօրէն շնորհաւորեց միութեան 100ամեակին առթիւ եւ խորհրդանշական համարեց, որ յոբելենական ձեռնարկը տեղի  կ՛ունենայ Հայաստանի Հանրապետութեան համար քաղաքական բուռն իրադարձութիւններու ժամանակաշրջանին:

Կը ներկայացնենք վարչապետ Փաշինեանի սոյն ձեռնարկին ընթացքին արտասանած խօսքը.

«Թոյլ տուէք ասել, որ վերջերս Հայաստանում տեղի ունեցած ոչ բռնի, թաւշեայ, ժողովրդական յեղափոխութիւնն ըստ էութեան կեանքի է կոչել ՀՄԸՄի կարգախօսը՝ բարձրացիր եւ բարձրացրու: Ի՞նչ տեղի ունեցաւ Հայաստանի Հանրապետութիւնում. խեղճացած, կռացած քաղաքացին վեր կացաւ, բարձրացաւ եւ բարձրացրեց իր հայրենիքը, իր հայրենիքի անունը, իր կարգավիճակը սեփական հայրենիքում եւ այսօր Հայաստանի Հանրապետութեան քաղաքացին ամուր կանգնած է իր ոտքերի վրայ՝ ուղիղ ողնաշարով եւ հպարտ հայեացքով: Սա շատ կարեւոր ձեռքբերում է, բայց սա ամէնը չէ, ինչին մենք ուզում ենք հասնել:

Մենք պէտք է շարունակենք մեր ընդհանուր կարգախօսի իրականացումը եւ շարունակենք բարձրանալ ու բարձրացնել մեր հայրենիքը: Բաւարար չէ, որ Հայաստանի Հանրապետութեան քաղաքացին այսօր ամուր կանգնած է իր ոտքերի վրայ բարձր եւ բարձրացրած իր երկրի, պետութեան հեղինակութիւնը:

Մենք յոյս ունենք, որ Հայաստանի քաղաքացին շարունակելու է իր ընթացքը, զարգացնելու է, ճախրելու է, թռչելու է մեր ազգային եւ պետական երազանքների մակարդակի: Մենք այսօր բոլորին կոչ ենք անում, սիրելի հայրենակիցներ, եկէք միասին՝ ազգովի բարձրանանք եւ բարձրացնենք, մենք Սփիւռքի մեր գործարարներին հրաւիրում ենք Հայաստանի Հանրապետութիւն, որպէսզի նրանք իրենց հայրենիքում, բարձրանան եւ բարձրացնեն, բարձրանան՝ իրենց քաղաքացիական գիտակցութեամբ, օրէնքի առաջ իրենց ունեցած պարտաւորութեան գիտակցութեամբ եւ բարձրանան իրենց անձնական, թիմային, գործարար յաջողութիւնների բերումով:

Մենք այսօր Հայաստանի Հանրապետութեան պետական կառավարման համակարգի պետական ծառայողներին կոչ ենք անում, ասում ենք՝ բարձրացէք եւ բարձրացրէք մեր հայրենիքը, բարձրացէք ձեր ծառայութեան մէջ, ոչ թէ անձնական շնորհների, ձեռքբերումների մէջ, այլ անձնական ծառայութեան մէջ մեր հայրենիքին եւ մեր ժողովրդին: Եւ մենք ուզում ենք արձանագրել, որ մեզնից իւրաքանչիւրի բարձրանալն իր հետեւից պէտք է բարձրացնի ուրիշներին, ոչ թէ ցածրացնի, ոչ թէ յուսահատութեան, յուսալքութեան եւ արտագաղթի անդունդը նետի մեր միւս հայրենակիցներին: Հայ Մարմնակրթական Ընդհանուր Միութիւնը չափազանց կարեւոր դեր է ունեցել մեր ժողովրդի պատմութեան մէջ եւ շարունակում է ունենալ սկսած հայ ժողովրդի շրջանում մարմնամարզական, մարմնակրթական աւանդոյթների սերմանումից, շարունակելով որբախնամ, հայապահպան առաքելութեամբ: Խորհրդանշական է, որ Կոստանդնուպոլսում հիմնուած ՀՄԸՄի 100րդ տարեդարձը նշւում է անկախ եւ ազատ Հայաստանի մայրաքաղաք Երեւանում: Սա խորհրդանշում է նաեւ ապագայի մասին մեր պատկերացումը:

Ինչպէս ՀՄԸՄն Կոստանդնուպոլսի տափաստաններից այս 100 տարուայ ընթացքում բարձրացաւ դէպի Հայաստանի Հանրապետութիւն, բառիս բուն եւ փոխաբերական իմաստով, այնպէս էլ մենք հայ ժողովրդի իւրաքանչիւր ներկայացուցչի հրաւիրում ենք բարձրանալ Հայաստան եւ բարձրացնել Հայաստանը: Սա է այն առաքելութիւնը, որ մեզ միաւորում է եւ այս առաքելութեան մէջ մենք անկասկած պէտք է յաղթենք: Եւ ուրեմն, կեցցէ՛ ազատութիւնը, կեցցէ՛ Հայաստանի Հանրապետութիւնը, կեցցե՛նք մենք եւ մեր երեխաները, որ ապրում են եւ ապրելու են ազատ ու երջանիկ Հայաստանում»: