ԵՐԵՒԱՆ, <<Արմէնփրէս>> - Հայաստան Համահայկական հիմնադրամի ժամանակաւոր գործադիր տնօրէն Պետրոս Թերզեան Տաւուշի մարզպետ Վահէ Ղալումեանին ներկայացուց Հայաստան համահայկական հիմնադրամի Տաւուշի մարզին մէջ իրականացուցած ծրագիրները:
«Տպաւորուած եմ Համահայկական հիմնադրամի իրականացրած ծրագրերով Հայաստանում եւ Արցախում: Յատկապէս ուրախալի է մեր մարզում կատարուած ծրագրերի ծաւալն ու արդիւնաւէտութիւնը: Պատրաստ եմ իմ լիազօրութիւնների սահմաններում համագործակցել եւ օժանդակել Հայաստան համահայկական հիմնադրամի նախագծերին Տաւուշում», նշեց մարզպետը:
Պետրոս Թերզեան տեղեկացուց, որ Համահայկական հիմնադրամը պիտի շարունակէ Տաւուշի մէջ սկսած նոր՝ արեւային ջրաջեռուցիչներու զետեղման ծրագիրը: Փորձնական համայնք ընտրուած է Խաշթառակը, ուր 50 ընտանիքներ արդէն կ՛օգտուին արեւային ուժանիւթէ:
«Տաւուշը մեր դիտակէտում է եւ չափազանց կարեւոր ենք համարում այս մարզի զարգացումը, քանի որ, նախեւառաջ, այն սահմանային է: Անվտանգութեան ապահովումը այստեղ նախ տնտեսութեան զարգացումով է ապահովուած, ինչն էլ անում ենք տասնեակ տարիներ», ընդգեց Պետրոս Թերզեան:
Արդէն տասը տարի է, որ մարզին մէջ կը գործէ «Հիմնատաւուշ» հիմնադրամը, որուն գործունէութիւնը միտուած է նպաստելու մարզի անասնապահական եւ գիւղատնտեսական ոլորտներու զարգացման: Հիմնադրամը հիմնուած է եւ կը ֆինանսաւորուի Հայաստան համահայկական հիմնադրամի եւ Ֆրանսայի Օ-Տը-Սեն գաւառի համագործակցութեամբ:
«Հիմնատաւուշ»ի ագարակը եւ կաթնամթերքի արտադրամասը կը գործեն Լուսաձոր գիւղին մէջ: Մարզպետն ու հիմնադրամի ժամանակաւոր գործադիր տնօրէնը շրջեցան ագարակի մէջ եւ գտնուեցան կաթնամթերքի արտադրամասը:
Նշենք, որ կաթնամթերքի գործարանը գիւղի 30 բնակիչներու աշխատանքով կ՛ապահովէ:
«Հիմնատաւուշ»ի ագարակին մէջ դանիական կովեր կը պահուին: Ագարակը կը համապատասխանէ եւրոպական չափանիշներուն: Տաւուշի Լուսաձոր համայնքի բնակիչները այս տարի պիտի ստանան նաեւ բարձր որակի ցորենի սերմնացու: Ութ հեկտար տարածքէն կը սպասեն նուազագոյնը 25 թոն ցորեն, որուն շնորհիւ գիւղի 110 ընտանիքները յաջորդ ցանքին համար բարձր որակի ցորենի անվճար սերմ պիտի ունենան: Ծրագիրը կ՛իրականացուի Հայաստան համահայկական հիմնադրամի ֆրանսահայ բարերարներու շնորհիւ՝ «Հիմնատաւուշ» հիմնադրամի միջոցով:
Յայտնենք, թէ Տաւուշի Խաչարձան համայնքը արժանթինահայերու հոգածութեան տակ է: Իջեւանի մէջ Միացեալ Նահանգներու Հայաստան հիմնադրամի ֆինանսաւորումով կը կառուցուի երկյարկանի մանկապարտէզ մը: Հիմնադրամին շնորհիւ Բաղանիսի մէջ լուծուած է ոռոգման ջուրի հարցը, իսկ պրազիլահայերը Այգեհովիտի մէջ ջերմոցներ կը կառուցեն:
Նշենք նաեւ, թէ Տաւուշի մէջ Հայաստան Հիմնադրամը կը գործէ գրեթէ բոլոր ոլորտներուն մէջ: