ԵՐԵՒԱն.- «Սասնայ Ծռեր»ու անդամներ՝ Սերգէյ Կիւրեղեանի եւ Տիգրան Մանուկեանի խափանման միջոցը 3 Օգոստոսին փոխուեցաւ «Ծառուկեան» խմբակցութեան 3 պատգամաւորներու անձնական երաշխաւորութեամբ: Ըստ «Նիուզ»ի՝ Երեւանի ընդհանուր իրաւասութեան դատարանի Շէնգաւիթի նստավայրէն կը յայտնեն, որ անոնք դատարանի դահլիճէն ազատ արձակուեցան:
Նշենք, որ անոնց համար անձնական երաշխաւորութիւն ներկայացուցին Նայիրա Զոհրապեան, Սերգէյ Բագրատեան եւ Վահէ Էնֆիաջեան, որոնք անձամբ ներկայացան դատարան:
Դատական գործին դատախազը չառարկեց խափանման միջոցը փոխելու նպատակով ներկայացուած միջնորդութեան:
Յիշեցնենք, որ ոստիկանութեան ՊՊԾ գունդի գրաւման փաստով 14 եւ 18 մեղադրեալներու երկու առանձին դատավարութիւն կ՛ընթանայ: Զինուած խումբի հիմնական մասը կը մեղադրուի գունդի տարածքը գրաւելու, պատանդ պահելու, ապօրինի զէնք-զինամթերք կրելու եւ փոխադրելու մէջ: Երեք ոստիկաններու սպանութեան համար կը մեղադրուին խումբի անդամներէն երկուքը: