ԵՐԵՒԱՆ, «Երկիր».- Ուրբաթ, 10 Օգոստոսին, «ՀՅԴ սոցիալ-տնտեսական քաղաքականութեան հիմնադրոյթները» նախագիծի շնորհահանդէսէն ետք, լրագրողներու հետ զրոյցին ընթացքին ՀՅԴ Բիւրոյի ներկայացուցիչ Հրանդ Մարգարեան ըսաւ. «Կարծում եմ՝ սրանով մենք կարեւոր սկիզբ ենք ճշդում մեզ համար: Ճիշդ է, որ Դաշնակցութիւնը միշտ սոցիալական (ընկերային-Խմբ.) արդարութեան կողմնակից է եղել եւ յաճախ իր ընտրական պլատֆորմերով (ամպիոններով, հարթակներով-Խմբ.) հրապարակ եկել, բայց սրանով մենք մի հայեցակարգ ենք ներկայացնում, որը դառնում է ինչ որ ուղեցոյց»:

Մարգարեան նշեց, որ ոեւէ դաշնակցական, ըլլայ նախարար, խմբագիր, գրող, թէ պատգամաւոր, սոցիալ-տնտեսական հարցերուն պիտի մօտենայ ըստ այս հայեցակարգին:

«Սա կարեւոր է այն առումով, որ Հայաստանի քաղաքական դաշտում կուսակցութիւնները յաճախ շատ են նմանւում իրար՝ իրենց սոցիալ-տնտեսական քաղաքականութեամբ: Կարող է իրար հայհոյեն, իրար չընդունեն, միմեանց բեւեռներ ներկայանան, բայց խորքում՝ սոցիալ-տնտեսական հարցերում նոյնն են: Մենք տարբերւում ենք բոլորից, որովհետեւ մենք լիբերալ (ազատական-Խմբ.) տնտեսական համակարգը չենք ընդունում, մերն աւելի շատ սոցիալ-դեմոկրատական հիմունքների վրայ է: Այս առումով, ես կարծում եմ, մենք կարեւոր քայլ ենք կատարում: Կարեւոր՝ նաեւ այն առումով, որ մեր ժողովուրդը, քաղաքականացած շերտը մեր երիտասարդութեան, մեր ժողովրդը պէտք է կարողանայ անդրադառնալ, որ աղքատութիւնը չսիրելը, աղքատութեան դէմ պայքարը միայն խօսքով եւ ցանկութեամբ չէ: Դա պէտք է նաեւ քաղաքականութիւն լինի, ծրագիր լինի՝ աղքատութիւնը վերացնելու հիմնաւոր ծրագիր: Պէտք է տեսնեն, որ դա Դաշնակցութիւնն ունի: Եւ այսպէս շարունակ, որովհետեւ կոռուպցիա (զեղծարարութիւն-Խմբ.) եւ այն բոլոր երեւոյթները, որոնց դէմ այսօր խօսում են, ինչ-որ պատճառով են ստեղծուել:

Միայն հետեւանքների դէմ պայքարելով չէ, որ կը կարողանաս երեւոյթներն արմատախիլ անել, պէտք է կարողանաս հիմնաւոր լուծումներ բերել: Մենք այդ  հիմնաւոր լուծումներն ենք բերում: Այս առումով, ես կարծում եմ՝ կարեւոր գործի սկիզբն է դրւում այսօր:

Այս սկզբը պէտք է դրուէր դեռեւս ամիսներ առաջ, սակայն վերջին իրադարձութիւնները խանգարեցին, եկանք, հասանք այսօրուան: Այս ծրագիրը նաեւ կարեւոր էր այն առումով, նկատի ունեմ՝ նախկինի եւ այսօրուայ վիճակը, որ մենք կոալիցիայի մէջ լինելով, նոր ուղղութիւն ենք բացում, որը հաւանաբար կառավարական քաղաքականութեան համահունչ չէ, բայց սա մեր քաղաքականութիւնն է, մեր տեսակն է: Եթէ մենք մեծամասնութիւն լինէինք, այդպէս կը ղեկավարէինք երկիրը, տնտեսութիւնը, սոցիալական հարցերին այդ մօտեցումը կը ցուցաբերէինք եւ կը ղեկավարէինք», նշեց Մարգարեան:

Հարցին, թէ այս նախագիծը կարելի՞ է դիտարկել իբրեւ նախընտրական քարոզարշաւ՝ Մարգարեան պատասխանեց. «Այդ դէպքում մենք պլատֆորմ կը ձեւաւորէինք եւ այդպէս կը խօսէինք, որպէսզի կոնկրետ (յստակ-Խմբ.) հարցերի պատասխանէինք: Բայց սա ուղղութեան, ուղեգծի ճշդում է, որն ընտրապայքարի հետ կապ չունի»:

Հրանդ Մարգարեան, անդրադառնալով նախագահ Ռոպերթ Քոչարեանը ազատ արձակելու միջնորդութենէն ետք Դաշնակցութեան հասցէին հնչող մեղադրանքներուն՝ ըսաւ. «Մենք ուզում ենք, որ այս շարժումը յաջողի: Այսպէս ասած՝ «Նոր Հայաստանի» շարժումն ուզում ենք յաջողի եւ յաջողելու համար ուզում ենք, որ չսխալուեն: Եւ, որովհետեւ չենք ուզում սխալուեն, տեսակէտ ենք յայտնում: Հակառակը՝ ոնց որ մտքի տեռոր լինի, այսինքն՝ մտահոգուելու իրաւունք էլ չունե՞նք, տեսակէտ ունենալու հնարաւորութիւն չունե՞նք: Մենք ուզո՞ւմ ենք՝ Նիկոլ Փաշինեանը յաջողի, թէ չենք ուզում: Եթէ չենք ուզում՝ թողնենք, ուշ թէ շուտ գլուխը կը կպնի քարին, իսկ եթէ ուզում ենք՝ ժամանակին պէտք է յիշեցնենք՝ ինչից խուսափի, որ ճանապարհով չգնայ, որտեղ ենք մենք մտահոգութիւն տեսնում: Եթէ գործընկեր ենք, այդպէս ենք կարող գործընկերութիւն անել, ոչ թէ լռելով եւ համակերպուելով: Մօտեցումը բարեացակամ է, մենք երկրի ապագայի համար ենք մտահոգ, մենք նոր Հայաստանով ենք մտահոգ: Բայց թոյլ չենք տայ ոչ մէկին մտքի տեռոր անել: Որովհետեւ տեռորը, տեռոր է, ուզում ես՝ կրակի մարդկանց վրայ, ուզում ես՝ միտքն արգելակի», յայտարարեց Հրանդ Մարգարեան: