ԵՐԵՒԱՆ.- Խորհրդարանին մէջ լրագրողներու հետ զրոյցի մը ընթացքին, ՀՅԴ խմբակցութեան ղեկավար Արմէն Ռուստամեան յայտարարեց, որ Դաշնակցութիւնը Ռոպերթ Քոչարեանին չէ աջակցած եւ չի պատրաստուիր աջակցիլ:

«Ընդհանրապէս, կուռքեր չպէտք է ստեղծի մեր ժողովուրդը: Դժբախտաբար, ես 88 թուականից այդ վիճակը տեսել եմ, նորից նոյն սխալը չկրկնենք: Կուռքեր չկան, անվերապահ որեւէ մէկին պաշտպանել ոչ մէկին խորհուրդ չեմ տալիս: Մեր՝ անվերապահ պաշտպանութիւնն արժեհամակարգին է վերաբերում, միայն դրան», պարզաբանեց պատգամաւորը:

«Եթէ մի անգամ մենք մեր կրքերով, զգացմունքներով եւ անաչառ չլինելով դատեցինք, վաղը դա կը դառնայ նորմ եւ յետոյ դրա դէմ պէտք է պայքարենք: Չի կարելի անարդարութեան դէմ ոչ արդար միջոցներով պայքարել, սա է մեր ասածը՝ կը լինի Ռոբերտ Քոչարեանի, թէ որեւէ մէկ ուրիշի դէպքում», շեշտեց Ռուստամեան։

Ռուստամեան նկատել տուաւ, որ նոյնիսկ մեղադրուողը իրաւունքներ ունի:

«Մենք այդ մակարդակին հասած ազգ ենք, մենք քարէ դարում չենք ապրում, որ զգացմունքներով դատենք: Եթէ դատարանը մեղաւոր կը ճանաչի, թող ամենախիստ պատիժը տայ, վերջանայ հարցը, բայց պէտք չէ դատարանից առաջ ընկնել: Այդպէս կարելի է ցանկացածին դատել, եւ մենք կ՛ունենանք հասարակութիւն, ուր բոլորը բոլորի դէմ են լարուելու: Այդ մթնոլորտը ես, դժբախտաբար, տեսնում եմ, սա է ինձ մտահոգում», ըսաւ Ռուստամեան:

Քոչարեանի հետ Դաշնակցութեան համագործակցութեան հաւանականութեան մասին հացրումին Ռուստամեան պատասխանեց, որ Դաշնակցութիւնը կը համագործակցի «ցանկացած անձի հետ, ով կիսում է ՀՅԴ մօտեցումներն ու նպատակները»:

«Այդպէս որ լինէր՝ մենք ՀՀՇի հետ էլ չպէտք է համագործակցէինք, ՀԱԿի հետ քառեակ չպէտք է կազմէինք, երբ ուղիղ մեզ հետ են խնդիր ունեցել: Մենք Լեւոն Տէր Պետրոսեանին ընդունել ենք մեր Գերագոյն մարմնում, եւ ինչ քարկոծում ասես՝ եղել է նաեւ այդ ժամանակ: Բայց մենք համարել ենք, որ ճիշդը դա է, որովհետեւ մենք մեր երկրում թշնամիներ չպէտք է ունենանք», նշեց ան:

«Մենք պէտք է շարունակենք մնալ այն հիմքի վրայ, որ մեր երկրում գործում են օրէնսդրական կարգաւորումներ, Սահմանդրութիւն եւ դա որեւէ ձեւով շրջանցելն ուղղակի անընդունելի է, մեզ ամբողջ աշխարհը չի հասկանայ»,  յայտարարեց Ռուստամեան՝ անրդադառնալով վարչապետի սահմանադրական փոփոխութիւններ կատարելու մտադրութեան:

Ըստ Ռուստամեանի՝ Հայաստան տարբեր միջազգային կառոյցներու հետ ձեւաւորած է օրէնսդրական դաշտ եւ այդ օրէնսդրական դաշտը մէկ օրուան մէջ կարելի չէ ոչնչացնել:

«Մենք հակասահմանադրական որեւէ միջոցառման կամ ծրագրի չենք պատրաստւում մասնակից դառնալ», յայտարարեց ան:

Ռուստամեան յայտարարեց, որ վարչապետին կողմէ հրապարակի վրայ հնչեցուցած բոլոր գաղափարները քննարկման կարգ ու ձեւ ունին:

«Բայց դատարաններ կան, պետական մարմիններ կան, եւ մէկ օրում համարել, որ դրանք գոյութիւն չունեն, ճիշդ ճանապարհ չէ: Ես չեմ կարծում, որ վարչապետը դա նկատի ունի, քանի որ ԱԺ նախագահի հետ հանդիպումից յետոյ լաւատեսութիւնն, այդ առումով, աւելի մեծացել է: Մենք էլ պատրաստ ենք բոլոր քննարկումներին մասնակցել, մեր լուման բերել, հասկանանք՝ ինչ ենք ուզում անել եւ ինչի համար», յայտարարեց ան:

Ռուստամեան շեշտեց, որ արտահերթ խորհրդարանական ընտրութիւնները այսօր ունին մէկ ճանապարհ՝ երկու անգամ վարչապետ չընտրել: Ան նաեւ ըսաւ, որ իր կարծիքով՝ վարչապետի մտավախութիւնը, թէ խորհրդարանը կրնայ գաղտնի վարչապետ ընտրել, տեղին չէ:

«Եթէ նա ինչ-որ դաւադրութիւններ է տեսնում, վարչապետի խօսքից դա կարելի էր նկատել, ես, ճիշդն ասած, դրա հիմքերը չեմ տեսնում: Առայժմ չի եղել նման դէպք, որ մի բան պայմանաւորուենք ու չարուի: ԱԺն իր այսօրուայ կարգավիճակով որեւէ կերպ չի խոչընդոտում  գործադիրի աշխատանքներին, այն օրէնքները, որ պէտք են, ընդունում է, անգամ անձեռնմխելիութիւնից զրկեց իր գործընկերոջը: Չեմ պատկերացնում, թէ այդ կասկածանքն ինչից է առաջացել, եթէ կայ այդպիսի կասկածանք, ճիշդ կը լինի դրա մասին խօսենք, հասկանանք՝ դա իրակա՞ն է, թէ ոչ», ըսաւ Ռուստամեան: