Վարչապետին հետ հանդիպած ամերիկահայութեան ներկայացուցիչներու շարքին էին ՀՅԴ Արեւմտեան Ամերիկայի Կեդրոնական կոմիտէի ներկայացուցիչներ Քարմէն Օհանեան եւ Աւետիք Իզմիրլեան

ՆԻՒ ԵՈՐՔ.- Վարչապետ Նիկոլ Փաշինեան աշխատանքային այցելութեամբ ժամանեց Նիւ Եորք: Կառավարութեան ղեկավարը 23 Սեպտեմբերի երեկոյեան, հանդիպում ունեցաւ Միացեալ Նահանգներու հայ համայնքի կառոյցներուն եւ հայկական կազմակերպութիւններու բազմաթիւ ներկայացուցիչներու հետ:

Փաշինեան շնորհակալութիւն յայտնեց ջերմ ընդունելութեան համար եւ նշեց, որ շատերուն արդէն իսկ հանդիպած է Հայաստանի մէջ, յուսալով, որ անոնք կը  վկայեն հայրենիքի մէջ այսօր տիրող բոլորովին այլ տրամադրութեան մասին:

«Երկու օր առաջ նշուեց Հայաստանի Հանրապետութեան անկախութեան 27րդ տարեդարձը: Անկախութեան տօնակատարութիւնների այդպիսի տօնական մթնոլորտ ՀՀում անկախութեան հանրաքուէից ի վեր հաստատուած չէր: Այդ տրամադրութիւնն, ըստ էութեան, այսօր հաստատուեց եւս մի փաստով: Տեղեակ էք, որ այսօր տեղի են ունեցել Երեւանի աւագանու ընտրութիւնները եւ հիմա արդէն տուեալների 99 տոկոսն ամփոփուած են, «Իմ քայլը» դաշինքն այդ ընտրութիւններում, որոնք անցել են բացարձակ արդար, ազատ, թափանցիկ պայմաններում, ստացել է ընտրողների 81 տոկոս ձայները: Սա նշանակում է, որ սին են բոլոր այն պնդումները, խօսակցութիւնները, որոնք յիշատակում են ինչ-որ ուժերի, որոնք կարող են հակայեղափոխութիւն անել: Դա հնարաւոր չէ եւ այսօր դա արձանագրուեց նաեւ ընտրութիւնների արդիւնքներով», նշեց վարչապետը՝ աւելացնելով, որ միակ բանը, որ այլեւս կարելի է Հայաստանի մէջ՝ օրինականութիւնն է, ժողովրդավարութիւնը, անկախ դատական համակարգը եւ ազատ տնտեսական մրցակցութիւնը:

«Կան բազմաթիւ խնդիրներ, որոնք կառավարութեան լուծելու առաջնահերթութիւնների թւում են. դրանք արտաքին քաղաքական են, տնտեսական, իրաւական եւ այլն: Մարդու իրաւունքների եւրոպական դատարանը երկու օր առաջ իր առաջին վճիռը հրապարակեց 2008 թուականի Մարտի 1-2ի դէպքերի գործերի հետ կապուած, եւ ինչպէս պնդում են իրաւաբանները, այդ վճռի իրաւական նշանակութիւնը հետեւեալն է, որ Մարտի 1ին եւ դրանից յետոյ Հայաստանի ողջ դատական համակարգը գործել է ապօրինի, որը ՄԻԵԴի պնդումն է, որի անկախութիւնը եւ անաչառութիւնը որեւէ կասկած չի թողնում: Սա նշանակում է, որ այն, ինչի մասին խօսում էի Օգոստոսի 17ի հանրահաւաքին, խօսքը դատական համակարգի խնդիրների մասին է, հաստատուեց նաեւ ՄԻԵԴ դատավճռով», ըսաւ կառավարութեան ղեկավարը:

Վարչապետը ընդգծեց, որ Հայաստան այսօր ունի մեծ մարտահրաւէրներ, որոնց լուծման գործին մէջ յոյս կը կապէ նաեւ Սփիւռքի հետ:

«Հայաստանի զարգացման մոդելի առանցքային փոփոխութիւնը հետեւեալն է. Հայաստանում կային մարդիկ, ովքեր բոլորից պահանջում էին ինչ-որ բան անել: Յեղափոխութիւնը եղաւ, երբ մարդիկ արձանագրեցին, որ ինչ-որ բան պէտք է անի մեզնից իւրաքանչիւրը: Յեղափոխութեան առանցքային իմաստն այն է, որ ՀՀ իւրաքանչիւր քաղաքացի ինչ-որ պահի զգաց իր դիրքորոշման շրջադարձային ուժը, զգաց, որ դա է Հայաստանի այսօրն ու ապագան որոշելու ճանապարհը: Ամենեւին էական չէ, թէ ով կը լինի ՀՀ վարչապետի կարգավիճակում՝ ես կամ որեւէ մէկը, ամենակարեւորն այն է, որ այսօր այլեւս միայն ՀՀ քաղաքացին է ազատ, արդար, թափանցիկ, ժողովրդավարական ընտրութիւններով որոշելու, թէ ով պէտք է լինի իշխանութիւն, ով՝ ընդդիմութիւն, ով լինի պատգամաւոր եւ ով՝ ոչ: Սա ամենակարեւոր փոփոխութիւնն է, որը որեւէ պարագայում չի փոփոխուի: Կարող է տարօրինակ թուալ, որ իշխող քաղաքական ուժը Երեւանի աւագանու ընտրութիւններում ստանում է այդքան ձայն, բայց բոլորդ գիտէք, որ այս ընտրութիւններին առանձնայատուկ քաղաքական կոնտեքստ էր հաղորդուել. ես խնդրել էի այս ընտրութիւններում «Իմ քայլը» դաշինքի օգտին քուէարկելով քուէարկել նաեւ Ազգային ժողովի արտահերթ ընտրութիւնների օգտին կամ ընդդէմ դրա», ըսաւ Նիկոլ Փաշինեան, աւելցնելով, որ յառաջիկային բանակցութիւններու պիտի հրաւիրէ խորհրդարանական եւ ոչ-խորհրդարանական քաղաքական ուժերը՝ քննարկելու խորհրդարանական արտահերթ ընտրութիւններու ժամանակացոյցն ու պայմանները:

«Կար տրամադրութիւն, որ դրանք անցկացուեն մինչ յաջորդ տարուայ Յունիս, բայց այն սպասողական վիճակը, որ ունեն պոտենցիալ (հաւանական-Խմբ.) ներդրողները, որոնց հարկաւոր են երկարաժամկէտ քաղաքական արձանագրումներ, ինչպէս նաեւ տնտեսական միջավայրը բարենապաստ դարձնելու համար, ընտրութիւնները պէտք է անցկացնենք աւելի վաղ, որպէսզի առաւել շուտ սկսենք տնտեսութեան վերականգնման ընթացքը: Այսօր մեր տնտեսութեան կառուցուածքը որեւէ լաւատեսութեան հիմք չի տալիս, եւ այն պէտք է փոխենք: Այսօր այն բաղկացած է երեք հիմնական ճիւղից. մէկը գիւղատնտեսութիւնն է, որը ժամանակակից պայմաններին չի բաւարարում, միւսը՝ հանքարդիւնաբերութիւնը, որն ազգային հարստութեան վաճառք է նշանակում, միւսը խաղադրոյքների ոլորտն է: Յուլիսին մեր տնտեսութիւնը ակտիւութեան երկնիշ ցուցանիշ էր արձանագրել. դրա պատճառը ֆուտբոլի աշխարհի առաջնութիւնն էր: Այս կառուցուածքը մեզ ձեռնտու չէ, եւ մենք ուզում ենք Հայաստանն ագրարային, հանքարդիւնաբերական, խաղադրոյքներ կատարող երկրից վերածել բարձր տեխնոլոգիական երկրի, որը մեր ամենակարեւոր հրամայականն է, ինչը բխում է մեր անվտանգային միջավայրից: Մեր կառավարութիւնը 4 ամսում արել է իրենից կախուածը՝ երկրում իրավիճակը կայուն պահելու համար, որովհետեւ յետ-յեղափոխական շրջանի ամենակարեւոր մարտահրաւէրը հէնց դա է, ինչը յաջողուել է մեզ: Այսօր մեր ամենակարեւոր խնդիրը նոր ներդրումներ ներգրաւելն է: Այդ նպատակով գնում ենք հարկային օրէնսգրքի բարեփոխումների, անկախ դատական համակարգի հաստատմանը, քաղաքական կայուն վիճակի պահպանմանը, ինչի համար պէտք է մօտ ժամանակներս անցկացնենք արտահերթ խորհրդարանական ընտրութիւններ: Երեւանի աւագանու ընտրութիւնների արդիւնքներով բոլորին ակնյայտ է, որ խորհրդարանական արտահերթ ընտրութիւններն անխուսափելի են, եւ դրանք պէտք է հնարաւորինս շուտ տեղի ունենան», ընդգծեց վարչապետը:

«ՀՀ քաղաքացիները հնարաւորութիւն են ունեցել քուէարկել նրա օգտին, որին ցանկանում են, եւ ի վերջոյ նրանք քուէարկել են յեղափոխութեան, արտահերթ խորհրդարանական ընտրութիւնների, ազատ եւ երջանիկ Հայաստանի օգտին: Այսօր փողն ընտրութիւնների արդիւնքների վրայ չունի որեւէ ազդեցութիւն, կը ստեղծենք գործիքներ, որ փողը քաղաքականութեան մէջ օգտագործուի ոչ թէ ձայն գնելու, այլ ասելիքն աւելի հասանելի դարձնելու համար», շեշտեց Փաշինեան:

Անդրադառնալով Հայաստան-Սփիւռք յարաբերութիւններուն՝ վարչապետը նշեց, որ պէտք է խրախուսուի ոչ թէ բարեգործութիւնը, այլ աշխատանքը:

«Հայութիւնը կարող է Հայաստանին աջակցել ընդամէնը մի տարբերակով՝ Հայաստանում ծաւալել տնտեսական գործունէութիւն, հիմնադրել որեւէ բիզնես եւ աշխատել: Այսօր Հայաստանի ընկալումը հետեւեալն է. այն մի երկիր է, որտեղ կարելի է ծաւալել տնտեսական գործունէութիւն, բիզնես հիմնադրել, շահոյթ ստանալ, հարստանալ եւ հարստացնել: Մեր ուղերձը բոլորին հետեւեալն է. հարստացէք եւ հարստացրէք: Մենք ուզում ենք, որ Հայաստանն ընկալուի այդպիսի երկիր, Հայաստանում պէտք է իրականացնել ոչ թէ բարեգործական, այլ զարգացման ծրագրեր, այնպիսին, ինչպիսին նաեւ ԹՈՒՄՕ կենտրոնն է, որը դարձել է ժամանակակից Հայաստանի ամենակարեւոր կենտրոններից մէկը: Յոյս ունենք, որ Հայաստանում կը ստեղծուեն նորանոր միջազգային բրենդներ (ապրանքանիշեր-Խմբ.), որոնք կը փոխեն պետութեան եւ հայ ժողովրդի ճակատագիրը ռազամավարական առումով: Գոյատեւող Հայաստանի ժամանակն աւարտուել է, եկել է զարգացող Հայաստանի ժամանակը: Հայաստան-Արցախ-Սփիւռք յարաբերութիւններին պէտք է վերաբերուենք որպէս մէկ միասնական օրգանիզմ», ըսաւ կառավարութեան ղեկավարը:

Նիկոլ Փաշինեան անդրադարձաւ նաեւ Հայաստանի արտաքին քաղաքականութեան:

«Մենք պատրաստւում ենք զարգացնել յարաբերութիւնները բոլոր միջազգային գործընկերների հետ, բայց չենք պատրաստւում դա անել մէկ այլ գործընկերոջ հետ յարաբերութիւնների հաշուին: Փորձելու ենք Ռուսաստանի Դաշնութեան, ԵԱՏՄ գործընկերների, Իրանի, Վրաստանի, ԵՄի ու ԱՄՆի հետ յարաբերութիւնները բարձրացնել նոր մակարդակի: Այդ յարաբերութիւններում պէտք է լինենք աւելի վստահ, ինքնիշխան պետութեանը յատուկ մօտեցումներով, իսկ արտաքին քաղաքականութիւնը վարենք ազգային շահերը սպասարկելու, այլ ոչ թէ իշխանութիւնը պահպանելու անհրաժեշտութիւնից ելնելով», շեշտեց վարչապետը:

Փաշինեան պատասխանեց Հայաստանի մէջ խօսքի ազատութեան, զանգուածային լրատուական միջոցներու ազատ գործունէութեան, մարդու իրաւունքներու պաշտպանութեան, անկախ դատական համակարգի ապահովման, Հայաստան Համահայկական հիմնադրամի գործունէութեան, կրթութեան, թեթեւ արդիւնաբերութեան, դրամատնային համակարգի զարգացման եւ այլ նիթերու: