Դաշնակցութեան Օրակարգին Վրայ Փաշինեանի Հետ Յուշագիր Ստորագրելու Հարց Չկայ

By Asbarez | Thursday, 11 October 2018

1010arsen

ԵՐԵՒԱՆ.- Երեքշաբթի, 9 Հոկտեմբերին, «Ազատութեան» թղթակիցին հետ զրոյցի մը ընթացքին ՀՅԴ Գերագոյն մարմինի ներկայացուցիչ Արսէն Համբարձումեան յայտնեց, որ Դաշնակցութեան օրակարգին վրայ վարչապետ Նիկոլ Փաշինեանի հետ յուշագիր ստորագրելու հարց չկայ:

Ըստ Համբարձումեանի՝ յուշագիրի ստորագրումը պէտք է իմաստաւորուած ըլլայ:

«Կարծում ենք, որ քաղաքական ուժերի միջեւ փոխվստահութիւնը շատ աւելի կարեւոր է քան ցանկացած ստորագրուած փաստաթուղթ: Եթէ յետագայ քննարկումների ընթացքում դրա անհրաժեշտութիւնը կ՛առաջանայ, պատրաստ ենք նաեւ քննարկել այդ տարբերակը, բայց այսօր մեր օրակարգում նման հարց չունենք: Մենք բազմիցս ասել ենք, որ արտահերթ խորհրդարանական ընտրութիւնների անցկացման անհրաժեշտութիւնը կասկածի տակ չի կարող դրուել», ըսաւ ՀՅԴ Գերագոյն մարմինի ներկայացուցիչը:

«Ազատութեան» դիտարկման, թէ խմբակցութիւնը ժամկէտներու հետ կապուած հարց կը տեսնէր՝ Համբարձումեան արձագանգեց. «Արտահերթ խորհրդարանական ընտրութիւնների անցկացման ժամկէտն էլ ինքնանպատակ չպէտք է դիտարկել: Մենք մշտապէս արտահերթ ընտրութիւնների անցկացման հարցը կապել ենք այն անհրաժեշտ քայլերի եւ գործողութիւնների հետ, որոնք ձեռք են բերուել քաղաքական պայմանաւորուածութիւնների արդիւնքում եւ ամրագրուած են կառավարութեան գործունէութեան ծրագրում: Դեկտեմբերի հետ կապուած մեր մտահոգութիւնը պայմանաւորուած է հէնց դրանով, որ իրատեսական չենք համարում մինչեւ Դեկտեմբեր այն քայլերի եւ գործողութիւնների կատարումը, որոնք անհրաժեշտաբար պէտք է նախորդեն արտահերթ խորհրդարանական ընտրութիւնների անցկացմանը»:

comments