ԵՐԵՒԱՆ, «Երկիր».- Վարչապետ նիկոլ Փաշինեան Երեքշաբթի, 16 Հոկտեմբերին,  ընդունեց ՀՅԴ խորհրդարանական խմբակցութեան ղեկավար Արմէն Ռուստամեանը, խմբակցութեան անդամ Սպարտակ Սէյրանեանը եւ ՀՅԴ Հայաստանի Գերագոյն մարմինի ներկայացուցիչ Արսէն Համբարձումեանը:

«Արդէն քննարկումների նոր փուլն է եւ ուրախ եմ այս առիթի համար: Շատ եմ կարեւորում այս երկխօսութիւնը եւ ուզում եմ ասել, որ բարձր եմ գնահատում ՀՅԴի գործունէութիւնն ու դերը մեր ժամանակակից քաղաքական կեանքում: Յոյս ունեմ, որ մեր խօսակցութիւնները, քաղաքական գործընթացները եւ քաղաքական իրավիճակը կ՛ընթանան համագործակցութեան շարունակութեան տրամաբանութեամբ եւ, ի հարկէ, մենք պատրաստ ենք անելու ամէն ինչ դրա համար: Համոզուած եմ, որ նաեւ ձեր ընկալումն է այդպիսին: Մենք քաղաքական այս իրավիճակում պէտք է մշտական երկխօսութեան մէջ լինենք, քննարկենք խնդիրները: Ես չեմ ուզում ասել, որ մենք յոյս ունենք, որ խնդիրներ չենք ունենայ, դա ընդհանրապէս լաւ ռեժիմ չէ որեւէ ժողովրդավարական երկրում, ուղղակի պէտք է յուսալ, որ բոլոր խնդիրները հնարաւոր կը լինի քննարկել փաստարկների, երկխօսութեան եւ քաղաքական իրավիճակի հաշուառման եւ երկրի պետական ու ազգային շահերի, ժողովրդի շահերի տրամաբանութեան տեսանկիւնից: Ուրախ եմ այս հանդիպման համար եւ շնորհակալ եմ նաեւ ձեր պատրաստակամութեան համար», հանդիպման ընթացքին յայտնեց վարչապետ Փաշինեան:

Իր հերթին, Արմէն Ռուստամեան ըսաւ. «Մենք եւս շնորհակալ ենք պարոն վարչապետ, բնականաբար, Դաշնակցութիւնն այն կուսակցութիւնն է, որ անկախ նրանից, թէ ինչպիսի զարգացումներ տեղի կ՛ունենան ներքաղաքական առումով, մենք յստակ ունենք մեր գաղափարներն ու քաղաքական դիրքորոշումները, որոնք անփոփոխ են մնալու: Մենք վստահ ենք, որ ի շահ մեր երկրի առջեւ կանգնած թէ՛ ներքին, թէ՛ արտաքին մարտահրաւէրների լուծման, անկախ յետագայ որեւէ դասաւորումից՝ մենք միեւնոյն է պէտք է շարունակենք միմեանց հետ համագործակցել ի շահ մեր երկրի, մեր պետութեան: Այդ առումով, Դաշնակցութեան լիարժէք աջակցութիւնը միշտ եղել է եւ կը լինի: Իսկապէս, շատ կարեւոր է, որ այս փուլում մենք կարողանանք բոլոր խնդիրները լուծել փոխադարձ յարգանքով, միմեանց տեսակէտները լսելով, համադրելով, որովհետեւ առողջ համագործակցութիւնը ենթադրում է նաեւ որոշակի հարցերի հետ կապուած քննարկումներ, ինչու ոչ՝ բանավէճեր: Վստահ եմ, որ արդիւնքում կարող ենք յանգել ընդհանուր յայտարարի, որովհետեւ մեր նպատակն իսկապէս նոյնն է: Մենք հէնց սկզբից այս նոր իրադարձութիւններին, յեղափոխութեանը, որ տեղի ունեցաւ Հայաստանում, շատ մեծ արժեւորում ենք տուել եւ իսկապէս համարում ենք, որ յեղափոխութիւնն ունի փուլեր, որ պէտք է անցնի: Մեզ համար մերժման փուլը նոյնպէս շատ կարեւոր էր, որը ենթադրում էր մերժել անցեալի բոլոր բացթողումները, սխալները: Պէտք է կարողանալ վերադասաւորուել եւ անցնել արագ կառուցման եւ այդտեղ մեր ամբողջական աջակցութեան վրայ դուք կարող էք միշտ յոյս ունենալ»:

Հանդիպման ընթացքին քննարկուեցան երկրին մէջ ստեղծուած քաղաքական իրավիճակին վերաբերող հարցեր: