ՀՅԴ Ներկայացուցիչները Յարգանքի Տուրք Մատուցեցին Ապրիլեան Հերոսներու Յիշատակին

By Asbarez | Monday, 08 April 2019

0403ishkhan

ԵՐԵՒԱՆ, «Երկիր».- ՀՅԴ Հայաստանի Գերագոյն մարմինի անդամներ եւ ՀՅԴ երիտասարդական ու ուսանողական միութիւններու ներկայացուցիչներ Երեքշաբթի, 2 Ապրիլին՝ քառօրեայ պատերազմի 3րդ տարելիցին օրը, Եռաբլուր զինուորական պանթէոնին մէջ խնկարկեցին նահատակ տղաներուն յիշատակը ու ծաղիկներ զետեղեցին անոնց շիրիմներուն առջեւ:

ՀՅԴ Հայաստանի Գերագոյն մարմինի ներկայացուցիչ, Ապրիլեան պատերազմին կամաւորագրուած Իշխան Սաղաթէլեան այս առթիւ յայտնեց, որ 2016ի Ապրիլը մեր պետութեան եւ ազգին համար զգօնութեան կոչ էր, որ պէտք է առաւելագոյնս ուշադիր ըլլանք սահմաններու պաշտպանութեան:

«Երբ թշնամին հերթական անգամ ագրեսիա (յարձակում-Խմբ.) իրականացրեց մեր պետութեան նկատմամբ, շնորհիւ այս հերոսների, մեր տղաների կարողացանք պաշտպանել մեր հայրենիքի սահմանները: Շատ կարեւոր է, որ, մեր հերոսներին ըստ արժանւոյն գնահատելով, կարողանանք շարունակական պահել մեր ազգի միասնականութիւնը եւ մեր հերոսների, հերոսների ընտանիքների կողքին լինենք», ըսաւ Սաղաթելեան:

Ան շեշտեց, որ միշտ պէտք է պատրաստ ըլլանք պատերազմի, որովհետեւ անիկա տակաւին աւարտած չէ: Իսկ խաղաղութիւնը, ըստ Սաղաթէլեանի, ձեռք կը բերենք պատերազմին պատրաստ ըլլալու ճանապարհով:

comments

Advertisement