Նուր Սուլթանի (Ղազախստան) մէջ տեղի ունեցող տնտեսական 12րդ ամէնամեայ ֆորումին մասնակցող Հայաստանի նախագահ Արմէն Սարգսեան հանդիպեցաւ հանրայայտ «Նոքիա» (Nokia) ընկերութեան տնօրէններու խորհուրդի նախագահ Ռիսթօ Սիլասմայի հետ:

Խօսելով աշխարհի մէջ տեղի ունեցող սրընթաց փոփոխութիւններուն մասին՝ նախագահ Սարգսեան ըսաւ, որ աշխարհը արագօրէն կը փոխուի արհեստագիտութիւններու, հետեւաբար նաեւ՝ «Նոքիա»ի նման ընկերութիւններու շնորհիւ: Նախագահը նշեց, որ Հայաստան նորարարութիւններու, նոր սկիզբներու հարթակ է, եւ երկրի ապագան սերտօրէն կապուած է նոր արհեստագիտութիւններուն հետ:

Զրուցակիցները յատկապէս կարեւոր համարեցին կրթական համակարգին դերը, զայն նկատելով՝ իբրեւ այդ բոլորին հիմքը:

Նշելով, որ մեր երկիրը Խորհրդային Միութենէն ժառանգած է բաւական լաւ կրթական համակարգ, նախագահ Սարգսեան նոյն ատեն ընդգծեց, որ Հայաստան բաց է «նորը»ին դիմաց: «Մենք մեծ կարեւորութիւն կու տանք կրթութեան, գիտութեան, արհեստագիտութիւններուն՝ խրախուսելով երիտասարդները՝ առաջարկելու նոր գաղափարներ, իւրացնելու նոր արհեստագիտութիւններ եւ ստեղծելու նոր սկիզբներ» ընդգծեց նախագահը:

«Նոքիա» ընկերութեան տնօրէններու խորհուրդի նախագահը իր հերթին ըսաւ, որ իրենք շատ հետաքրքրուած են Հայաստանի մէջ արհեստագիտութիւններու ոլորտի զարգացման կարելիութիւններով: Ան նշեց նաեւ, որ արագ փոխուող աշխարհի մէջ յաջողակ պիտի ըլլան այն երկիրները, որոնք լաւ հիմք կը պատրաստեն այդ փոփոխութիւններուն համար:

Նախագահ Սարգսեան ընկերութեան ղեկավարութեան առաջարկեց այցելել Հայաստան՝ տեղւոյն վրայ ուսումնասիրելու եւ քննարկելու համագործակցութեան հեռանկարային ուղղութիւնները:

«Նոքիա» ընկերութիւնը մասնագիտացած է հեռահաղորդակցութեան, տեղեկատուական արհեստագիտութիւններու եւ ելեկտրական սարքերու արտադրութեան ոլորտներուն մէջ: Ընկերութիւնը մեծ ուշադրութիւն կը դարձնէ եւ մեծ միջոցներ կը ներդրէ հայթայթելու համար արհեստագիտական նոր լուծումներ՝ զանոնք իրենց արտադրանքին մէջ կիրառելու համար: