ԵՐԵՒԱՆ.- Հարկային օրէնսգրքին մէջ փոփոխութիւններ կատարելու եւ համահարեթեցուած հարկային դրութիւն հաստատելու Ազգային ժողովի «Իմ Քայլ»ը պատգամաւորական խումբի նախաձեռնութեան հակադրուած ՀՅԴ Հայաստանի Գերագոյն մարմինը հանդէս եկած է հետեւեալ յայտարարութեամբ.

Հայաստանի կառավարութիւնը Ազգային ժողով է ներկայացրել Հարկային օրէնսգրքում փոփոխութիւններ եւ լրացումներ կատարելու մասին օրինագիծ, որով առաջարկւում է եկամտային հարկի պրոգրեսիւ դրոյքաչափերի հարկման համակարգը փոխարինել համահարթ (մէկ միասնական) դրոյքաչափով:

Առաջարկութիւնը հակասում է  սոցիալական շուկայական տնտեսական կարգ ունենալու, սերունդների միջեւ հանրային համերաշխութեան ապահովման, սոցիալական պետութեան սահմանադրական պահանջներին:

Այն հակասում է  նաեւ երկրի առաջ ծառացած աղքատութիւնը յաղթահարելու, աշխատանքը խրախուսելու, արժանապատիւ վարձատրութեան համակարգ ներդնելու՝ կառավարութեան կողմից տրուած խոստումներին:

Համահարթ եկամտահարկի ներդրմանը դէմ են արտայայտւում հանրութեան մասնագիտական եւ երիտասարդական լայն շրջանակներ, ձեւաւորուել է «Ահազանգ»  հասարակական երիտասարդական շարժում՝ ընդդէմ համահարթ եկամտահարկի:

Արժեւորելով եւ քաջալերելով դէմ արտայայտուողների վճռականութիւնը՝ ՀՅԴ Հայաստանի Գերագոյն մարմինը անընդունելի է համարում կառավարութեան ներկայացրած առաջարկութիւնը, պահանջում է հրաժարուել դրանից:

Հրապարակելով ՀՅԴ մասնագիտական ոլորտային յանձնախմբերի գրասենեակի կողմից ներկայացուող տեսակէտը՝ ՀՅԴ Հայաստանի Գերագոյն մարմինը բոլոր շահագրգիռ կողմերին առաջարկում է համատեղ քննարկել դրանով ներկայացուող այլընտրանքային լուծումները:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ