«Երկիր»ը կը հաղորդէ, որ Չորեքշաբթի, 5 Յունիսին, Ազգային ժողովին մէջ, 2018ի պետական պիւտճէի կատարողականի քննարկման ընթացքին, վարչապետ Նիկոլ Փաշինեան խօսեցաւ նաեւ բռնութեան մասին: Վարչապետը դիտել տուաւ, որ բոլորին համար ալ մեծագոյն առաջնահերթութիւններէն մէկը բռնութենէ զերծ հասարակութիւն ունենալն է, ապա աւելցուց, որ Հայաստան բռնութենէ զերծ երկիր է:

«Շատ կարեւոր է արձանագրել, որ մենք լիարժէք հաւատարիմ ենք այն արժէքներին, որը հռչակել ենք ոչ բռնի, թաւշեայ ժողովրդական յեղափոխութեան ընթացքում: Հայաստանի Հանրապետութիւնում յաղթել է սիրոյ եւ համերաշխութեան յեղափոխութիւնը եւ մեր կառավարութեան համար ինչպէս եղել է, այնպէս էլ շարունակում է մնալ խնդիր այդ յեղափոխութեան արժէքների ներդրումը ՀՀում՝ որպէս հանրային յարաբերութիւնների մշտական գործող համակարգ եւ արժէքային համակարգ: Մեզ համար ի սկզբանէ մեծագոյն խնդիրներից մէկը եղել է եւ շարունակում է մնալ բռնութիւնից զերծ հանրութեան ձեւաւորումը: Ես կարծում եմ, որ ՀՀում այսօր հէնց այդպիսի միջավայր է ձեւաւորուած: ՀՀն բռնութիւնից զերծ երկիր է, մենք պէտք է ինստիտուցիոնալ (կառուցային-Խմբ.) առումով արմատաւորենք բռնութիւնից զերծ հանրութեան տեսլականը եւ տրամաբանութիւնը եւ բռնութեան այն քարոզը, որը տեղ ունի ՀՀում, իմ գնահատմամբ դրանք լուսանցքային երեւոյթներ են, ետցնցումային երեւոյթներ են եւ որեւէ կասկած չկայ, որ բռնութիւն քարոզող եւ բռնութեամբ գործող ուժերը եւ անձինք, անկախ նրանից, թէ նրանք իշխանութեան համակիրներն են, թէ ընդդիմութեան, դուրս են մղուելու ՀՀի հանրային եւ քաղաքական կեանքից: Իհարկէ այլ դէպքերում, երբ դուրս մղման պրոցեսը տեղի կ՛ունենայ հանրային պրոցեսների արդիւնքում՝ դա այլ պատմութիւն եւ պրոցես է, այն դէպքում, երբ պէտք է իրաւապահ մարմիններն արձագանգեն այդ երեւոյթների, դա բոլորովին այլ գործընթաց է:

Նաեւ խորհրդարանի աջակցութեամբ պէտք է ամէն ինչ անել, որպէսզի այդ առումով իրաւապահ մարմինների աշխատանքը լինի արդիւնաւէտ: Ես ուզում եմ յստակ արձանագրել որպէս ՀՀ վարչապետ եւ մարդ, ով այս կարգավիճակին արժանացել է ոչ բռնի, թաւշեայ յեղափոխութեան արդիւնքում, խստօրէն դատապարտում եմ բռնութեան որեւէ դրսեւորում: Կրկին եմ ասում՝ անկախ նրանից, դա իշխանութեան, կառավարութեան համակիրների կողմից կամ այդպիսի մարդկանց կողմից է արւում, թէ հակառակը, բռնութեան որեւէ քարոզ, բռնութեան որեւէ դէպք, բռնութեան որեւէ դրսեւորում, ատելութեան որեւէ դրսեւորում ՀՀում տեղ չունի եւ տեղ չպէտք է ունենայ եւ ես համոզուած եմ, որ չի կարող ունենալ: Կարծում եմ, որ այս առումով ՀՀում կայ հանրային կոնսենուս (համախոհութիւն-Խմբ.) եւ այն պէտք է արտայայտուի նաեւ պետական մարմինների աշխատանքում», իր խօսքին մէջ ըսաւ վարչապետը:

Փաշինեան նաեւ անդրադարձաւ «ազգային արժէքների համար մարդ ծեծել»ու երեւոյթին: Ըստ վարչապետին՝ այդ բանաձեւը յայտարարողները «այն ուժերն են, որոնք ազգային արժէքների համար «25-30 տարի երկիրը թալանել են ու այդ ընթացքում ոչ մի խօսք չեն ասել ազգային արժէքների մասին»:

«Էդ որ ասում էին, աչքով էին տալիս՝ բա զինուած ուժերը, բա բանակը, բա էս: Իրանք թալանել են քաղաքացուն, թալանել են բանակը, իրանք թալանել են իրաւական համակարգը, իրանք թալանել են պետական բիւջէն, իրանք թալանել են ամէն ինչ», ըսաւ Փաշինեան:

Պատասխանելով լրագրողի մը հարցումին, թէ խօսքը Դաշնակցութեան մասի՞ն է, վարչապետը պատասխանեց, որ խօսքը իշխանութեան մէջ եղած այն ուժին մասին է, որ կ՛ըսէ, որ յանուն ազգային արժէքներու՝ բռնութիւն  պիտի կիրառէ:

Վարչապետը նշեց, որ Երեքշաբթի օրուան ցուցական արարքէն ետք (ոստիկանութեան յանձնուելու եւ Վարդան Յարութիւնեանը ծեծած ըլլալու պատասխանատուութիւնը ստանձնելու դէպքերը) մարդ ծեծելու հանգամանքները պէտք է իրաւապահները պարզեն՝ արդեօք եղած է յանձնարարակա՞ն, եւ արդեօք կազմակերպուա՞ծ գործողութիւն էր։ «Եթէ կազմակերպուած ակցիա էր, դրա իրաւական գնահատականը պէտք է փոխուի, եւ բոլոր այն մարդիկ, ովքեր բռնութիւն են քարոզում, նրանք հատ-հատ պատասխանատուութեան են ենթարկուելու: Ես չեմ ուզում վերադառնալ այն բառապաշարին՝ ասֆալտին փռել, պատերով տալ, բայց ասում եմ՝ որեւէ մէկը մեր բարեկրթութիւնը թող յանկարծ չշփոթի թուլութեան հետ»: