Հրայր Թովմասեանի Ցնցող Յայտարարութիւնները. Նա Դիմադրելու Է Մինչեւ Վերջ

By Asbarez | Tuesday, 08 October 2019

1000hrayr

ՍԱՐԳԻՍ ԱՐԾՐՈՒՆԻ

 

Սահմանադրական դատարանի շուրջ գործընթացը քաղաքական է եւ մէկ նպատակ է հետապնդում՝ քաղաքական որոշումների ընդունման ճանապարհին չէզոքացնել ՍԴն որպէս արգելապատնէշ. «Արմնիւզ» ՀԸ «Օրախնդիր» հաղորդմանը նման կարծիք է յայտնել ՀՀ Սահմանադրական դատարանի նախագահ Հրայր Թովմասեանը: «Իմ կարծիքով՝ այս պրոցեսը (գործընթացը-Խմբ.) քաղաքական է: Այն մէկ նպատակ է հետապնդում՝ քաղաքական որոշումների ընդունման ճանապարհին չէզոքացնել Սահմանադրական դատարանը որպէս արգելապատնէշ, խոչընդոտ, որպէս մարմին, որը մի պահի կարող է քաղաքական որոշումներին ասել՝ «ստոպ», որովհետեւ դրանք հակասում են Սահմանադրութեանը», ասել է ՍԴ նախագահը:

«Կանգ առ»ը, «ստոպ»ը դարձել են պոպուլեար (ժողովրդական-Խմբ.) արտայայտութիւններ, որոնցով յեղափոխութեանը հակադրուող գործիչներն ընդդիմանում են գործող իշխանութիւններին: ԱԱԾ տնօրէնի պաշտօնից հեռացուած Արթուր Վանեցեանը յորդորում է իշխանութեանը «կանգ առնել»՝ չյստակեցնելով, թէ ինչ նկատի ունի: Հիմա Հրայր Թովմասեանը, որի լիազօրութիւնները դադարեցնելու հարցով ՍԴ դիմելու նախագիծը խորհրդարանում դրուել է շրջանառութեան մէջ, խօսում է «ստոպ»ի մասին: Թովմասեանն իհարկէ գրեթէ բաց տեքստով (բնագիրով-Խմբ.) ակնարկում է, որ «ստոպ» է ասում յեղափոխութեան զարգացմանը:

Երէկուայ հարցազրոյցում Թովմասեանն իհարկէ երկար փորձել է հերքել իր ու նախորդ համակարգի այսօրուայ առնչութիւնները, սակայն յամառօրէն շրջանցել է օբյեկտիւ (առարկայական-Խմբ.) այն իրականութիւնը, որ իր պաշտօնավարումը, որը հակասում է սահմանադրական կարգաւորումներին, ամբողջովին տեղաւորւում է իշխանութեան վերարտադրութեան այն սցենարի (բեմագրութեան-Խմբ.) մէջ, որը պէտք է երկարաձգեր Սերժ Սարգսեանի իշխանութիւնը: Յեղափոխութեան արժէքները լիարժէքօրէն կապիտալիզացուած (օգտագործուիր-Խմբ.) չեն կարող լինել, եթէ հին համակարգի, քրէաօլիգարխիայի (յանցաւոր սակաւապետութեան-Խմբ.) տրամաբանութիւնը շարունակի գործել ՍԴի դէմքով: Այլ խօսքով՝ Հրայր Թովմասեանը հրաշալի հասկանում է, որ իր հեռանալը բխում է 2015ի հանրաքուէով հաստատուած սահմանադրական կարգաւորումներից, յեղափոխութեան օրակարգից, «Մերժենք Սերժին»ի տրամաբանութիւնից, սակայն դիմում է տարբեր տեսակի մանիպուլեացիաների (ձեռնավարութիւններ-Խմբ.), քարոզչական տրիւկների (հնարքներու-Խմբ.) պաշտօնը պահպանելու համար:

ՍԴ նախագահի կարծիքով՝ իր դէմ սկսուած գործընթացների պատճառը միայն Սահմանադրական դատարանի Սեպտեմբերի 4ի որոշումը չէ, որով ՀՀ երկրորդ նախագահ Ռոբերտ Քոչարեանի դիմումի քննութեան արդիւնքում Քրէական դատավարութեան օրէնսգրքի 35րդ յօդուածը ճանաչուեց հակասահմանադրական: Ըստ նրա՝ խնդիրը շատ աւելի խորը, ընդարձակ է, որի նպատակն է ունենալ այնպիսի ՍԴ, որը «քաղաքական որոշումները կը փաթեթաւորի իրաւական շղարշով»: ՍԴ նախագահը յայտարարել է, որ չի նահանջելու, քանի որ համարում է, որ ՍԴն սահմանին իրեն վստահուած տարածքն է. «Ինձ համար սասահմանագիծ է, մեր սահմանի՝ ինձ վստահուած տարածքն է ՍԴն: Մէկ քայլ յետ գնալը, ընկճուելը, ճնշուելը դաւաճանութեան են հաւասար: Այս օր մեր սահմանին ինձ վստահուած տարածքն է Սահմանադրական դատարանը: Ինձ համար այդ սահմանին կանգնելը նոյն հոգեբանական վիճակն է, ինչ որ այսօր հայ-ադրբեջանական սահմանին կանգնած մեր զինուորը», պաթետիկ (սրտայոյզ ոճով-Խմբ.) տօնով յայտարարել է Թովմասեանը:

Նման ստանդարտ (հիմնաչափ-Խմբ.) ձեւակերպումներով, պսեւդոհայրենասիրական (կեղծ հայրենասիրական-Խմբ.) սլոգաններով (լօզունգներով-Խմբ.) ՍԴ նախագահը անգամ մատնում է, թէ նախկին համակարգի որ գրասենեակներում է նախապատրաստուել իր հարցազրոյցը:

Նոյնիսկ անյարմար ու ամօթալի է, որ քրէաօլիգարխիայի շահերի պաշտպանութիւնը նոյնացւում է հայ-ադրբեջանական սահմանին կանգնած զինուորի պաշտպանութեան հետ:

Ումի՞ց ու ինչի՞ համար է Թովմասեանը պաշտպանում երկիրը՝ հասարակութեան քուէն ստացած իշխանութիւնի՞ց: Իրապէս շատ պրիմիտիւ (նախնական, հին-Խմբ.) ու ծիծաղելի է թւում այս ամէնը, միւս կողմից՝ մտահոգիչ, որովհետեւ Հրայր Թովմասեանի երէկուայ խօսքից կարելի է ենթադրել, որ նա յամառօրէն դիմադրելու է, ինչը նշանակում է, որ հին համակարգն առայժմ ընկրկելու ցանկութիւն կամ մտադրութիւն չունի:

Դարձեալ մնում ենք այն կարծիքին, որ քաղաքական իշխանութիւնն ամենեւին էլ ամենաարդիւնաւէտ ճանապարհը չի ընտրել ՍԴ ճգնաժամը յաղթահարելու համար: Անհրաժեշտ է եւս մէկ անգամ դիմել ուղղակի ժողովրդավարութեան մեխանիզմների (մեքենակառոյցի-Խմբ.) օգնութեանը՝ ՍԴ նոր կազմի ձեւաւորման հիմքերը ստեղծելով սահմանադրական փոփոխութիւնների հանրաքուէի միջոցով:

comments

More headlines

Յայտարարութիւն

«Մաքրոն 9-10 Սեպտեմբերին Պիտի Այցելէ Երեւան Եւ Պաքու» Կ՛ըսէ «Ալֆա Նիուզ»-ի Աղբիւրը

Արցախի Ազգային Ժողովի 4 Խմբակցութիւններ Նախագահի Թեկնածու Առաջադրած Են Սամուէլ Շահրամանեանը

Երեւան-Պաքու Լարուածութիւնը Մագլցում Կ՛արձանագրէ

Ատրպէյճանի Կողմէ Առեւանգուած Երեք Ուսանողները Վերադարձուեցան Հայկական Կողմին

Մաքրոն Մտադիր Է Դիւանագիտական Նոր Նախաձեռնութեան Սկսելով Ուժեղացնել Պաքուի Վրայ Ճնշումը

Ըստ Հայաստանի Արտաքին Գործոց Նախարարութեան. Ազրպէյճանը Անթաքոյց Կերպով Կը Ծրագրէ Հաւաքական Պատիժի Ենթարկել Լեռնային Ղարաբաղի Ամբողջ Ժողովուրդը

Արցախի Նախագահը Անվտանգութեան Խորհուրդի Նիստի Հրաւիրեց. Քննարկուեցան Առեւանգուած Քաղաքացիները Վերադարձնելու Քայլերը

Ազրպէյճանցիները Բերձորի Միջանցքի Անցակէտին Վրայ Կ՛առեւանգեն Երեք Արցախցի Երիտասարդներ

Ստեփանակերտը Կը Հերքէ Լուրերը Աղտամի Ճանապարհի Վերաբերեալ Որոշում Տալու Մասին

Advertisement