ԵՐԵՒԱՆ.- ՀՅԴ Գերագոյն մարմինը հետեւեալ հաղորդագրութիւնը հրապարակեց սահմանադրութեան փոփոխութիւններու հանրաքուէին առիթով.

«Ափսոսանքով փաստում ենք. օրուայ քաղաքական իշխանութիւնը, չհետեւելով բազմաթիւ յորդորների եւ զգուշացումների, երկիրը ներքաշում է հերթական արկածախնդրութեան մէջ:

«Շահարկելով եւ ձեւախեղելով անմիջական ժողովրդավարութեան կարեւոր ինստիտուտ (հիմնարկութիւն-Խմբ.) հանդիսացող հանրաքուէն, իշխանութիւնը քօղարկում է ամէն գնով մենիշխանութիւն հաստատելու սեփական նպատակն ու երկրի առջեւ ծառացած սպառնալիքները չէզոքացնելու անկարողութիւնը:

«Դատապարտելով ամբոխավարական մեթոդներով արհեստական օրակարգ ձեւաւորելու քաղաքական իշխանութեան վարքագիծը, ահանզանգ հնչեցնելով այս հակասահմանադրական ընթացքի մասին, ՀՅԴ Հայաստանի Գերագոյն մարմինը յայտարարում է՝ անընդունելի է հակաօրինական ճանապարհով հարցեր լուծելու իշխանութեան մօտեցումը:

«Ըստ այդմ.

«Կոչ ենք անում Հայաստանի քաղաքացիներին՝ մասնակից չդառնալ իշխանութիւնների կողմից նախաձեռնած հերթական ապօրինութեանը, անտեսել 5 Ապրիլին նշանակուած հանրաքուէն՝ յստակ ուղերձ յղելով իշխանութիւններին, որ ժողովուրդն այլեւս յոգնել է պոպուլիզմից (ամբոխահաճութենէն-Խմբ.), արհեստածին օրակարգերից, հասարակութիւնը «սեւերի» ու «սպիտակների» բաժանելու քայքայիչ քաղաքականութիւնից, արդէն շարունակական դարձած ցնցումներից, որոնք այդպէս էլ չնպաստեցին հանրային բարեկեցութեան աճին եւ իրական ժողովրդավարութեանը:

«Դիմում ենք քաղաքական կուսակցութիւններին, քաղաքացիական հասարակութեանը, մեր հայրենակիցներին՝ միաւորել իրենց ջանքերը՝ բացառելու «այո»ն, կանխելու հակապետական այս ընթացքը եւ, ի վերջոյ, ձեռնամուխ լինել իրական բարեփոխումների իրականացմանը: Այս նպատակներին հասնելու համար Դաշնակցութիւնը կը ձեռնարկի անհրաժեշտ գործողութիւններ»։