Մարտի 28ին՝ Սուրբ Գրիգոր Լուսաւորչի սոսկալի չարչարանքների եւ Խոր Վիրապ մուտքի յիշատակութեան օրը, հանդիսապետութեամբ Գարեգին Բ. ծայրագոյն պատրիարք եւ Ամենայն Հայոց կաթողիկոսի, Մայր Աթոռ Սուրբ Էջմիածնում՝ Ս. Տրդատի բաց խորանին, կատարուեց Հանրապետական մաղթանք մեր հայրենիքի եւ ժողովրդի համար:

Այս առիթով դուրս էր բերուել Մայր Աթոռում պահուող հայոց եկեղեցու մեծագոյն սրբութիւններից՝ մեր հաւատքի հայր Սուրբ Գրիգոր Լուսաւորչի Աջը, որով արարողութեան ընթացքում Ամենայն Հայոց կաթողիկոսն օրհնեց հայոց աշխարհն ու մեր ժողովրդին՝ հայցելով բազմաչարչար հայրապետի բարեխօսութեամբ Երկնաւոր Տիրոջ զօրակցութիւնն ու օգնութիւնը՝ աշխարհին եւ մեր ժողովրդին պատուհասած համավարակի դիմագրաւման համար։

Արարողութեան աւարտին Ամենայն Հայոց կաթողիկոսն իր պատգամն ուղղեց համայն հայութեան՝ վերջում վերստին Լուսաւորչի Սուրբ Աջով եւ «Պահպանիչ» աղօթքով օրհնելով աշխարհասփիւռ մեր ժողովրդին։

Գարեգին Բ. Ամենայն Հայոց Կաթողիկոսի Խօսքը Ս. Գրիգոր Լուսաւորչի Չարչարանաց Եւ Մուտն Ի Վիրապն Տօնին՝ Հայրապետական Մաղթանքի Առիթով

Յանուն Հօր եւ Որդւոյ եւ Հոգւոյն Սրբոյ. ամէն:

«Աստծուց է զօրութիւնն ու փառքն իմ,
Աստուած է օգնականն իմ
եւ Աստծու վրայ է յոյսն իմ» (Սաղմ․ 61:8):
Սիրելի բարեպաշտ ժողովուրդ,

Այսօր՝ մեր հաւատքի հայր Սուրբ Գրիգոր Լուսաւորչի չարչարանքների եւ Խոր Վիրապ մուտքի յիշատակութեան օրն է։ Այս առիթով Մայր Աթոռ Սուրբ Էջմիածնում Սուրբ Գրիգոր Լուսաւորչի սրբազան եւ սրբարար մասունքներից սփռուող օրհնութեան ներքոյ աղօթք վերառաքեցինք առ Ամենակալն Աստուած՝ խնդրելով Տիրոջ ողորմութիւններն ու օրհնութիւնները աշխարհասփիւռ մեր ժողովրդին եւ համայն աշխարհին։

Սուրբ Գրիգոր Լուսաւորչի վարքն ու չարչարանքները վկայում են նրա զօրեղ հաւատքի եւ առ Տէրն աներկբայ յոյսի մասին: Բազում տառապանքների ու նեղութիւնների մէջ նա ամուր պահեց Աստծուն ապաւինելու իր կամքը՝ աղօթելով սաղմոսերգուի բառերով. «Աստծուց է զօրութիւնն ու փառքն իմ, Աստուած է օգնականն իմ, եւ Աստծու վրայ է յոյսն իմ» (Սաղմ․ 61:8)։ Արդարեւ, սիրելիներ, Լուսաւորիչ հայրապետի սխրանքի ուղին Քրիստոսասէր ազգիս համար դարձել է քաջալերող օրինակ աստուածապաւինութեան, համբերատարութեան ու արիութեան` յատկանիշներ, որոնք կենսականօրէն անհրաժեշտ են բոլոր ժամանակներում, մասնաւորապէս դժուարին այս օրերին, երբ մեր ժողովուրդը համայն մարդկութեան հետ միասին պայքարում է համավարակի յաղթահարման համար: Հայոց երկրորդ Լուսաւորիչ Սուրբ Գրիգորի զօրեղ հաւատքով մեր ժողովուրդը արժանացաւ Հարուցեալ Փրկչի լուսեղէն էջքին հայրենի հողում: Ազգովի հաւատացինք Միակ ճշմարիտ Աստծուն, Նրա Միածին Որդուն եւ փրկչական առաքելութեան: Քրիստոսի յաղթական Յարութեան յոյսին խարսխուած կեանքը ճառագեց Հայոց աշխարհում, եւ հաւատքը դարձաւ մեր ժողովրդի համար կենսապարգեւ զօրութիւն, որով կերտեցինք մեր ոսկեդարը, մեր դպրութեան  ու մշակոյթի բարձր արժէքները, դիմակայեցինք պատմութեան արհաւիրքներին, վերապրեցինք Հայոց Ցեղասպանութիւնը եւ վերահաստատեցինք մեր անկախ պետականութիւնը։

Սիրելի զաւակներ մեր, այսօր մեր եւ աշխարհի կեանքը փոթորկած համավարակի փորձութեան մէջ նոյնպէս մեր հաւատքի հայրը իր կեանքի օրինակով պատգամում է մեզ յուսալ առ Աստուած, ընդունել Նրա զօրութիւնը եւ հաւատքը դարձնել կեանքի ճանապարհ: Յիրաւի, նա, ով հաւատում եւ վստահում է Աստծուն, չի վախենում կամ տարուբերւում փորձութեան փոթորկայոյզ ուժգին ալիքներից, եւ որպէս ժայռի վրայ հաստատուած տուն, որը հնարաւոր չէ կործանել, մնում է ամուր ու հաստատուն, քանզի նրա խարիսխը Աստծոյ յոյսն է, ինչպէս առաքեալն է ասում. «Մենք հաստատուն մխիթարութիւն ունենանք. մենք, որ ապաստան գտանք՝ կառչելու առաջիկայ յոյսից, որը հաստատուն եւ անշարժ խարիսխ է մեզ համար» (Եբր․ 6:18-19)։

Սիրելիներ, աղօթական այս պահին ի դէմս համայն հայութեան, մեր սրտում ունենալով նաեւ ապաքինման կարօտ մեր զաւակներին, խոնարհուեցինք Սուրբ Գրիգոր Լուսաւորչի մասունքակիր Աջի առջեւ եւ հայրաբար օրհնեցինք ձեզ, որ զօրանաք հաւատով ու սիրով, գօտեպնդուէք յոյսով, զինուէք համբերութեամբ եւ փորձութեան այս օրերը դարձնէք հնարաւորութիւն՝ առանձնութեան մէջ խորհելու կեանքի ու հոգեւոր արժէքների կարեւորութեան, միմեանց հանդէպ հոգատարութեան, մեր երկրի ու ժողովրդի առջեւ ծառացած մարտահրաւէրների յաղթահարման եւ ապագայատեսիլ իրագործումների մասին: Ստեղծուած իրավիճակում մենք ամէնքս կոչուած ենք խստագոյնս հետեւելու պետական պատկան մարմինների ցուցումներին, առաւելագոյն սթափութիւն ու զգօնութիւն դրսեւորելու, որպէսզի պատճառ չդառնանք վարակի տարածման, չվտանգենք մեր, մեր հարազատների ու հայրենակիցների առողջութիւնը:

Այժմ հրաւիրում ենք ձեր սրտաբուխ աղօթքով միանալու մեր հայցին առ Աստուած եւ խնդրելու Տիրոջ ամենախնամ հովանին ու պահպանութիւնը՝ համայն աշխարհին եւ մեր զաւակներին՝ ի Հայաստան, Արցախ եւ ի Սփիւռս: