ԵՐԵՒԱՆ, «Արմէնփրէս».- Եւրոպական խորհուրդի նախագահ Շարլ Միշել եւ Եւրոպական յանձնաժողովի նախագահ Ուրսուլա Ֆոն Տեր Լէյեն միացեալ նամակը յղեցին Հայաստանի Հանրապետութեան վարչապետ Նիկոլ Փաշինեանին:

Անոնք նախ շնորհակալութիւն յայտնեցին վարչապետին՝ Եւրոպայի օրուան առթիւ անոր ուղղած շնորհաւորագիրին համար։ «Եւրոպական Միութիւնը եւ Հայաստանը կ՛օգտուին Արեւելեան գործընկերութեան եւ Համապարփակ եւ ընդլայնուած գործընկերութեան համաձայնագիրին ընձեռած հնարաւորութենէն՝ սերտ յարաբերութիւններ հաստատելով: Եւրոպական Միութիւնը եւ Հայաստանը այդ մէկը իրականացուցած են երկու կողմերուն համար ընդհանուր այնպիսի ուժեղ արժէքներու հիման վրայ, որոնց կարգին են ժողովրդավարութիւնը, իրաւունքի գերակայութիւնը եւ մարդու իրաւունքներու նկատմամբ յարգանքը: Մենք կը խրախուսենք ձեզ՝ շարունակելու ձեր բարեփոխիչ գործունէութիւնը այս ամուր հիմերուն վրայ: Այս տարի, աւա՜ղ, մենք ստիպուած ենք դիմակայելու «Քորոնա» ժահրի մարտահրաւէրը. ասիկա արհաւիրք մըն է, որ կը վերաբերի բոլորիս», կ՛ըսուի նամակին մէջ, ուր կը նշուի նաեւ, որ ասիկա համերաշխութեան եւ միջազգային սերտ համագործակցութեան պահ է:

Պաշտօնատարները դիտել կու տան, որ Եւրոպական Միութիւնը արդէն իսկ իր յստակ աջակցութիւնը ցուցաբերած է Հայաստանին` այս ճգնաժամը դիմակայելու համար` մասնաւորապէս եւրոպական ֆոնտերէն յատկացնելով 92 միլիոն եուրօ: Նամակին մէջ կը շեշտուի, որ Եւրոպական Միութիւնը պիտի շարունակէ Հայաստանին օժանդակել՝ ոչ միայն առողջապահական, այլ նաեւ ընկերային եւ տնտեսական մարզերուն ուղղութեամբ։

Անոնք կը հաստատեն, որ միասին կարելի պիտի ըլլայ այս ճգնաժամէն դուրս գալ աւելի զօրացած՝ աւելի լաւ ապագայ կառուցելու համար։