ԵՐԵՒԱՆ, «Արմէնփրէս».- Արցախի Հանրապետութեան նախագահ Արայիկ Յարութիւնեան 21 Օգոստոսին ընդունեցին ՀՅԴ Բիւրոյի նախագահ Արմէն Ռուստամեանը:

Երկրին ղեկավարը բարձր գնահատեց Դաշնակցութեան կատարած հետեւողական աշխատանքը համահայկական հարցերու լուծման առումով` յատկապէս ընդգծելով Արցախի անկախութեան կերտման դժուար ճամբուն վրայ եւ հետագայ ձեռքբերումներուն մէջ կառոյցին ներդրած զգալի աւանդը:

Հանդիպման ընթացքին քննարկուեցան լիբանանահայութեան աջակցելուն, անհրաժեշտութեան պարագային` անոնց հայրենադարձութեան կազմակերպման, ինչպէս նաեւ հայրենիքի անվտանգային համակարգին ու արտաքին մարտահրաւէրներուն վերաբերող շարք մը առանցքային հարցեր:

Արմէն Ռուստամեան հանրապետութեան նախագահին ներկայացուց նաեւ նախորդ տարի Ստեփանակերտի մէջ տեղի ունեցած «Հայաստան-Արցախ ռազմավարական դաշինք» ֆորումին ընդունած հռչակագիրին դրոյթները:

Արայիկ Յարութիւնեան հաստատեց, որ հետեւողական պիտի ըլլայ ազգային ու պետական շահերու պարունակին մէջ զանոնք կեանքի կոչելու գործին մէջ:

Հանդիպման մասնակցեցաւ նաեւ ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան:

Նոյն օրը ՀՅԴ Բիւրոյի նախագահ Արմէն Ռուստամեան Ստեփանակերտի մէջ հանդիպում ունեցաւ նաեւ Արցախի մէջ գործող շարք մը քաղաքական ուժերու ղեկավարներուն հետ:

Այս մասին «Ապառաժ»ի հարցումին պատասխանելով` Արմէն Ռուստամեան տեղեկացուց, որ այցելութեան նպատակը Մայիս 2019ին տեղի ունեցած` «Հայաստան-Արցախ ռազմավարական դաշինք» ֆորումին իբրեւ արդիւնք ձեւաւորուած կազմակերպական կոմիտէի գործունէութեան աշխուժացումն է:

«Նկատի ունենալով Արցախի Ազգային ժողովի նոր ձեւաւորուած կազմը, հանդիպումներ եմ ունեցել խորհրդարանում ընդգրկուած կուսակցութիւնների ղեկավարների հետ: Հանդիպումների նպատակը` ֆորումի արդիւնքում ստեղծուած կազմկոմիտէի գործունէութիւնն ակտիւացնելն է, ինչպէս նաեւ աշխատանքային խմբի թարմացումը` ԱՀ նոր գումարման Ազգային ժողովում ընդգրկուած կուսակցութիւնների ներգրաւմամբ», նշեց Ա. Ռուստամեան: