Երէկ ՀՅԴ Բիւրոյի անդամ, Արցախի Հանրապետութեան Ազգային ժողովի նորընտիր նախագահ Դաւիթ Իշխանեան հրապարակեց հետեւեալ կոչը Արցախի ներքաղաքական իրավիճակին վերաբերեալ.

«Լինելով Արցախի Հանրապետութեան քաղաքացի եւ Ազգային ժողովի նախագահ` միշտ պայքարել եմ Արցախի Հանրապետութեան նախագահի, Ազգային ժողովի եւ ուժային կառոյցների` որպէս պետականութեան հիմք ներկայացնող հիմնարկների կայացման ու հզօրացման համար:

Անընդունելի է վերջին օրերին հանրային հարթակներում կեղծ համախմբման կոչերի քողի տակ հանդէս եկող որոշ դէմքերի` մեր պետականութեան հիմքերի կազմաքանդմանն ուղղուած քայլերը:

Ես Ազգային ժողովի նախագահի պաշտօնը ստանձնել եմ քաղաքական ուժերի համախոհութեան արդիւնքում: Համոզուած եմ, որ այդ համախմբումը միս ու արիւն է տալու պետականութեան պահպանման վեհ գաղափարին, որի օրինական ներկայացուցիչներն են նախագահի եւ Ազգային ժողովի հիմնարկները:

Բոլոր այն քայլերը, որոնք միտուած են սեպ խրելու եւ ընդհանրապէս պետական կառոյցների տարանջատմանն ու հակադրութեանը, բացառապէս թշնամանք են ստեղծում երկրի ներսում եւ ջուր լցնում թշնամու ջրաղացին:

Վստահ եմ` այս ծանր օրերին ուժային եւ իրաւապահպան կառոյցների ներկայացուցիչները գիտակցում են պետականութեան պահպանման գինն ու կարեւորութիւնը ու նրանց վստահուած մեր անվտանգութիւնն ու ներքին անդորրի պահպանումը:

Որպէս երկրի քաղաքական ղեկավարութիւնը ստանձնած երկրորդ դէմք` ինչպէս ժամանակին մարտի դաշտում անմասն չեմ մնացել պետականութեան ստեղծման գործընթացին, հաւատարիմ եւ հաստատակամ մնալով մեր նահատակների որդեգրած նպատակներին, գիտակցելով ներքին համերաշխութեան կարեւորութիւնը, պատրաստ եմ իմ բոլոր ուժերը ներդնել` համատեղ որոշումներ կայացնելու եւ այս իրավիճակից մեր հանրապետութիւնը նուազագոյն վնասներով դուրս բերելու ուղղութեամբ:

Որպէս օրէնսդիր մարմնի ղեկավար, համոզուած եմ, որ Արցախի Ազգային ժողովը կը ստեղծի բոլոր պայմանները` դառնալու ոչ միայն քաղաքական քննարկումների, այլեւ հանրութեան խնդիրները ներկայացնող եւ լուծումներ առաջադրող հարթակ:

Վստահեցնում եմ ձեզ, որ Ազգային ժողովը պատրաստ է հիւրընկալել հանրութեան կառուցողական միտում ունեցող տարբեր շերտերի եւ պատրաստակամ է լսելու բոլորի կարծիքը եւ այն ներկայացնելու թէ՛ Արցախի Հանրապետութեան նախագահին, թէ՛ պատկան մարմիններին:

Համոզուած եղէք, որ այս ծանր կացութիւնից դուրս կը գանք մեր հաստատակամ, արդար, անմնացորդ նուիրուածութեան ու համերաշխութեան շնորհիւ:

Կոչ եմ անում բոլորիդ ցուցաբերել զգօնութիւն եւ զսպուածութիւն` ի շահ մեր երկրի ու ժողովրդի»:

ԴԱՒԻԹ ԻՇԽԱՆԵԱՆ
Արցախի Ազգային ժողովի նախագահ