ԵՐԵՒԱՆ, «Նիուզ».- Հայաստանի առաջնակարգ ճատրակի վարպետ Լեւոն Արոնեան Փետրուար 2ին հրապարակած է ՖԻԴԷի նախագահ Գիրսան Իլիւմժինովին եւ ՖԻԴԷի նախագահական կառոյցի անդամներուն ուղղուած յայտարարութիւն մը, որուն մէջ ըսուած է.

«Լրատուամիջոցներից տեղեկացայ, որ աշխարհի չեմպիոնի կոչման յաւակնորդների մրցումների անցկացման յայտ են ներկայացրել Ատրպէյճանի եւ Պուլկարիայի շախմատային ֆետերացիաները:

«Ուզում եմ տեղեկացնել ձեզ, որ Ատրպէյճանում տիրող ընդհանուր մթնոլորտը եւ մեր երկրների միջեւ գոյութիւն ունեցող մշտական լարուածութիւնը անհնար են դարձնում իմ մասնակցութիւնն Ատրպէյճանում անցկացուող որեւէ բարձրակարգ մրցաշարի:

«Այնպիսի պատասխանատու եւ կարեւոր միջոցառում, ինչպիսին աշխարհի չեմպիոնի կոչման յաւակնորդների մրցաշարն է, նրա մասնակիցներից պահանջում է հոգեկան անդորր եւ ուժերի արտակարգ կենտրոնացում: Ոչ շախմատային ոչ մի հանգամանք չպէտք է գրոսմայսթըրին խանգարի ցուցադրելու այն ամէնը, ինչին նա ընդունակ է: Խիստ անհրաժեշտ է բարոյահոգեբանական բարենպաստ մթնոլորտ, որը, ցաւօք, այս պահին Ատրպէյճանում չկայ ազգութեամբ հայ որեւէ անձնաւորութեան համար: Բոլոր մասնակիցները պէտք է գտնուեն հաւասար պայմաններում, ինչը անհնար է յաւակնորդների մրցաշարը Պաքւում անցկացնելու դէպքում: Անվտանգութեան երաշխիքներն ու ցանկացած տեսակի լրացուցիչ աջակցութիւնը չեն կարող օգնել իրավիճակին:

«Հաշուի առնելով վերոյիշեալը, տեղեկացնում եմ ձեզ, որ ես հաճոյքով կը մասնակցեմ աշխարհի չեմպիոնի կոչման յաւակնորդների մրցաշարին աշխարհի ցանկացած այլ երկրում, բայց իմ մասնակցութիւնը Ատրպէյճանում անցկացուող յաւակնորդների մրցաշարին բացառւում է:

«Յոյսով եմ, որ դուք հաշուի կ՛առնէք այս նկատառումները՝ մրցավայրի հարցը նախագահական խորհրդի նիստում քննարկելիս»։