ՍՏԵՓԱՆԱԿԵՐՏ.- Ատրպեճանական մամլոյ գործակալութիւնը (ԱՓԱ), վկայակոչելով Ատրպէյճանի պաշտպանութեան նախարարութեան բանբեր գնդապետ Էլտար Սապիրօղլուի խօսքերը՝ հաղորդած է, թէ Յունուար 18ին, ղարաբաղեան կողմը խախտած է հրադադարը, եւ սահմանագիծի վրայ, Թարթար շրջանի Կապանլի գիւղին մօտ, տեղի ունեցած է փոխհրաձգութիւն, որուն հետեւանքով 3 ատրպէյճանցի զինուորներ մեռած են, 2 ուրիշներ՝ վիրաւորուած: Սապիրօղլու յայտարարած է նաեւ, թէ հայկական կողմը աւելի մեծ թիւով կորուստներ ունեցած է:

Նշեալ դէպքին կապակցութեամբ, ատրպեճանական կազմակերպութիւններէն մէկը՝ <<Ղարաբաղի Ազատագրութեան կազմակերպութիւնը>>, երէկ յայտարարած է, թէ պատերազմը, առանց վարանելու, պէտք է օր առաջ սկսիլ:

Միւս կողմէ, <<Ղարաբաղեան կողմը պահպանում է հրադադարի ռեժիմ>>, երէկ <<7օր>>ի թղթակիցին յայտնած է Լեռնային Ղարաբաղի հանրապետութեան պաշտպանութեան բանակի հանրային կապերու վարչութեան պետ Սենոր Հասրաթեանը՝ նշելով, որ ատրպեճանական կողմը պարբերաբար կը խախտէ հրադադարը, սակայն ԼՂՀ պաշտպանութեան բանակը կը լռեցնէ զայն:

<<Բայց, ի տարբերութիւն միւս օրերի, երէկ աւելի հանգիստ է եղել>>, յայտնած է Ս. Հասրաթեան՝ աւելցնելով, որ ղարաբաղեան կողմը ոչ մէկ կորուստ ունեցած է:

<<Զոհուածներից մէկը լեզգի է, մէկը՝ աւար, միւսը՝ թալիշ>>, յայտնած է Հասրաթեան՝ այդ պարագան իբրեւ խօսուն փաստ համարելով ատրպէյճանցիներուն կողմէ ազգային փոքրամասնութիւնները ճնշման ենթարկելու տեսակէտին:

«Հարց է առաջանում, թէ նրանք ինչպէ՞ս են զոհուել: Ամենայն հաւանականութեամբ, դա միջանձնային փոխյարաբերութիւնների արդիւնք է, որը յաճախ է տեղի ունենում ադրբեջանական բանակում>>, ընդգծած է Հասրաթեան:

Երէկ, Լեռնային Ղարաբաղի հանրապետութեան նախագահ Բակօ Սահակեանը այցելած է բանակի առաջին գիծի վրայ շարք մը զօրամասեր:
Հանրապետութեան գլխաւոր հրամանատարը լսած է մարտական հերթապահութիւն կատարող հրաձգային ստորաբաժանումներու հրամանատարներուն զեկոյցները, ծանօթացած է պաշտպանական համակարգի ամրապնդման ուղղուած աշխատանքներուն եւ յուշանուէրներով պարգեւատրած է լաւագոյն զինծառայողները: Նախագահ Սահակեան ներկայ գտնուած է նաեւ ռազմական վարժութիւններու: