ՊՈԼԻՍ, «Արմէնփրէս».- «Apple»ի հիմնադիր Սթիւ Ճապզի Պոլիս այցելած ընթացքին, անոր ուղեկցող զբօսաշրջային ուղեվար Ասիլ Թունճեր վերջերս թրքական լրատուական միջոցներուն յայտնած է, թէ Ճապզ թշնամի եղած է թուրքերուն, որովհետեւ ան յայտարարած է, թէ թուրքերը ցեղասպան ըրած են 1.5 միլիոն հայ:
Թունճերի խօսքով, տեղեկատուական ճարտարագիտութիւններու (IT) ոլորտին մէջ աշխարհահռչակ Սթիւ Ճապզ, որուն յայտնագործութիւններէն կ՛օգտուին նաեւ թուրքերը, եղած է թուրքերուն թշնամին: Թունճեր յայտնած է, թէ Ս. Սոֆիա տաճարին մօտեցած ընթացքին, Ճապզ չէ կրցած զսպել իր զայրոյթը՝ տեսնելով տաճարին շուրջ մահմետական մինարէները:
«Ես անոր բացատրեցի, որ այդ մինարէները թուրքերը կառուցած են քրիստոնէական տաճարը գրաւելէ ետք, զայն մզկիթ դարձնելու համար: Այնուհետեւ ան ինծի ուղղակի հարցախոյզի ենթարկեց՝ ըսելով, թէ ի՞նչ ըրած ենք Պոլսոյ եւ ընդհանրապէս Թուրքիոյ մէջ բնակող միլիոնաւոր ոչ-մահմետականներուն: Դեռ բերանս չբացած՝ ան յայտարարեց. «Դուք ցեղասպանութեան ենթարկեցիք 1.5 միլիոն հայեր: Հիմա բացատրէ՛, թէ ատիկա ինչպէ՞ս եղաւ»», պատմած է Ճապզի թուրք ուղեկիցը:
